الثلاثاء، 22 يناير، 2013

أورلاندو الجزء التالت (Orlando Part 3)

أورلاندو- فلوريدا
Orlando- Florida
(الجزء التالت)
إيييوة تالت .. كدة

إللي فاته وما قري الجزء الأول و الثاني
إليلكم الروابط

جزئنا الثالث هو عبارة عن مكمل للأجزاء السابقة و سوف يكون عبارة عن تجربتي الشخصية للسفر مرتين على التاولي لنفس المدينة و ليش طلعتها مرتين... أكيد مليون واحد سافر قبل كده أورلاندو .. والله داري .. بس لكل واحد نظرته الشخصية ..
من جد أوعدكم حيكون تقرير حماسي.. وفيه كل شي حلو .. ويا رب يعجبكم
=============================
زاوية الشكر
بحمد الله تجاوزت 200 الف مشاهد
ألف شكراً
لكل نفر فيكم
وزي ما وعدتكم
سوف يتم السحب على جهاز
IPHONE5
:)
في الأيام القادمة
تابعني في تويتر
@aido4ever
عشان تفهم الموضوع
السحب حيكون في تاريخ
01/02/2013
 *********************************************

إيش أحسن طريقة الواحد يروح بيها أورلاندو؟
على حسب الخطوط إللي إنت مسافر عليها... لو تبغى تبنجخ و تعنطز.. وللراحه كمان عشان ما تعاني .. لو مسافرين على الخطوط السعودية خد راحة يوم في البلد إللي توصل لها على الأقل (نيويورك أو واشنطن)
 لو واصل من أوروبا .. برضو خد لك تمشية أبو يومين في البلد إللي رايحلها .. سواء لندن أو باريس أو مادريد...
صحيح في ناس فله و يقولو الرحلات حقت الخطوط المصرية ممتازة بس أنواع الهياط و التعب (محطتين عشان توصل أورلاندو)

أتكلمت عن الفنادق .. بس ما أتكلمت يا حلو عن المدارييه و الملاهي .. بكم؟
مداريه!! تصدق .. أنت المفروض تطلع ثول يا خدمي لول ... المهم قبل أي حاجة تقدر تقول إنك لففيت أورلاندوا لو رحت التالي:
  • الديزني (كل المملكات مع المرافق)
  • ينوفيرسل (Universal studio & Island of Adventure)
  • سي وورلد
ما زاد عن كدا معناتوا خير و بركة وللمعلومية لسا باقي مدينة ملاهي جديدة فتحت ما كتبت عنها (ليجو لاند) مو عشان شي بس كسل :)
لو جبنا على الثلاثة الأشياء الرئيسيه (انا شخصيا أفضل سعر جبته على أساس 2 كبار و 1 طفل) 2000 دولار شاملة الأتي:
  • 8  أيام الديزني و كل مرافقها (تنطبق الأحكام و الشروط)
  • 14 يوم متعدد الزيارات للسي ورلد
  • 2 يوم لليونيفيرسال و أيسلاند أوف أدفينتشر
الرجاء ملاحظة: أصحك تعمل فيها فتك و تشتري التذاكر من نفس مدينة الملاهي .. ليش؟ غالية وطابور عند الله خبره

طيب كم يوم تكفي في أورلاندو؟
والله شوف وبدون مبالغه ... 15 يوم كحد أدنى .. في ناس عملوا فيها و قالوا 10 كفاية مثلا ... الفكرة إنه الواحد لما يسافر ينبسط .. مو جهاد (فيييس حاقد) .. ترا مشورة غير طبيعيه داخل الملاهي و مشي و تعب

كيف وضع المرافق و الأكل و اللازي منه
أورلاندو مليانه بكل حاجه ... في أماكن حابب أوضح أنها كثير بس لازم تعرف فين أماكنها جنب بيتك
  • وول مارت: سوبرماركت ممكن تشتري منه سياره !! من جد كل شي فيه و مهم تعرف فين أقرب واحد من سكنك
  • وول جرين: صيدلية على بقالة (أعتذر للتشبيه - هيا زي السوبرماركت) ممتازه و الادوية هنا.
إيش عندك نصايح
أوكي .. من خبرتي البسيطه شوف الزبد:
  • لبس حاجه خفيفة مهم هناك (شبشب - صندل - تي شيرتات) ماحد عندك و ما يطلوا إيش لابس
  • البنزين: قبل ما تدخل لمحطة البنزين (حتلاقي يافطه مكتوب فيها الأسعار) .. أبو كل شي 5 دولار فأكثر صفففف أمها غالية
  • الفنادق: الرجاء متابعة الفندق و سؤاله عن وضع الإنترنت .. أغلبهم بفلوس و غالي ممكن يوصل 10 دولار في اليوم
  • عنايتهم الفائقة للناس المعاقين بحيث توفير كل مستلزمات الراحه لهم و هذا شي ملاحظ من مواقف و مرافق عامة وكدا
  • البلد مافيها أمريكان كثير هههههه أغلب الناس سياح و أي خدمه
  • ينصح بأن تطلع رخصة دولية
في الأخير... للعوائل .. تعتبر أورلاندوا (من أفضل الأماكن بالعالم) حابب أقدم مقطع يوضح أورلاندوا بعيييييووووني ... إن شاء الله يعجبكم و بكذا نكون أنتهينا من أورلاندوا وإللي حابب زيادة معلومات .. يتابعني في طوييييطر أخر التقرير





============================
================
=======
===


تعليقاتكم من أجل التطوير تهمنا ... وسامحونا على التقصير
بس وكدة
Subscribe
Aido Advisor
our facbookgroup click below
Please Follow me on Twitter
@aido4ever
:)
=============================================
لمتابعة تقارير مطاعم جدة زورونا على مدونه
لمتابعتنا على تقارير السفر و السياحة الآخرى زورنا على مدونة





الأربعاء، 29 أغسطس، 2012

أورلاندو الجزء الثاني (Orlando part 2)

أورلاندو- فلوريدا
Orlando- Florida
(الجزء الثاني)

إللي فاته وما قري الجزء الأول
إليلكم الرابط

الجزء الثاني هو عبارة عن الإستعدادات إللي قبل السفر و بعض النصائح إللي تخلي رحلتكم خفيفة و ظريفة
كل الكلام إللي حقوله هوا عبارة عن تجربه شخصية و الله أعلم أعتقد إنه هيا الأفضل بموجب ما شفت
كمان حأقدم بعض الخيارات الآخرى إللي ممكن تساعدك في عملية التخطيط لأجمل بلد عائلي في العالم
=====================================
زاوية الشكر
بلغ عدد القراء لكل هرطلتي أكثر من
130 ألف قارئ
يووووي
والله ألف شكر لكم و إن شاء الله أكمل و أكون قد الثقة
========================================
نصائح عيدوهيه
الشنط
  • لا يسمح للشنط ذات الحجم الكبير جدا في أمريكا (أسأل محل الشنط الأحجام المحدده لأمريكا)
  • أغلب شركات الطيران في أمريكا تحاسب الشخص على شنط السفر (ديلتا 25 دولار ولكل شخص شنطتين وبوزن 50 باوند - 30 كيلو يعني)
  • يرحم أمكم لا تكثروا من الشنط وقت السفر و أشتروا من هناك ولا حططوا شنطه جوة شنطه
  • يا بخت من خفف في الملابس لأنه حتنشغف بالشراء من هناك .. مهم جدا
  • يا ريت لا تكون الشنطة لونها أسود لأننوا احححححا 80% من شنطنا سوداء اللون - و إن كانت سوداء حاول تمييزها عن غيرها
الملابس
    بس حابب اوريكم اللبس كيف ... صففوا النية لووول

  • أورلاندو بلد لا يمكن الواحد يلبس فيها شي محترم و كشخه لووول
  • في عادة لأهلي هناك إسمها (الكادلاك) .. وهو الحذاء أو الشبب المحبب إللي يتلبس في أي وقت .. وهذا كل ما تحتاجه للرجل و المرأة  
  • الشورتات و التي شيرتات أكثر منها و قلل من البنطلونات و الجينزات
  • الأخوات .. كل ما يكون اللبس قطني .. كل ما يكون أحسن .. الجينز و الحرير ما ينفع هناك
  • الجزم !! مال أمها داعي هناك .. شيل جزمة رياضة و من هناك أشتري شبشب كشخه و في الغالب حيكون الكادلاك حقك
  • يا مكثر الصيدليات و السوبرماركت .. يعني ما يحتاج كل أدوات الحمام تشيلوها من هنا .. لأنه حتشتروا من هناك
  • أهم حاجه تشيلوها من السعودية هي (المضادات الحيوية - معجون الأسنان - جبنة كاسات كرافت) مافي هههههه



تأجير السيارات
من جد هادي السيارة طيبة جدا جدا

  • أورلاندو ماهي زي لندن أو نيويورك ... لاااازم تأجر سيارة
  • كل ما تبدر في حجز السيارة كل ما حتلاقي السعر يقل
  • كل ما تزيد مدة تأجير السيارة كل ما السعر حيقل
  • www.pricline.com أفضل مكان أستأجرت منه سيارات (في نظام المكاسرة طيب - قولي وانا أساعدك)
  • لما توصل هناك .. حتضطر تدفع غير قيمة التاجير .. التأمين .. أختار الوسط
الفنادق

  • مهما حاولت .. مافي أحد يقدر يقولك إيش أحسن مكان تسكن فيه .. لأنه السكت متوفر و بشكل مرضي للكل
  • مافي حاجه ببلاش .. الإنترنت في أغلب الأماكن تدفع فيه فلوس تقريبا عشرة دولار في اليوم
  • ولو يقولك مجاني الإنترنت (حتلاقي في التشيك أوت فلوس تدفعها مقابل إنترنت) !! بس مهم جدا
  • الغسيل متوفر في كل منتجع وفي كل مكان .. إذا كان لشقة أو فيلا أكثر من غرفتين حتلاقي الغسالة في نفس السويت
  • شخصيا انا سكنت في (Caribe Royal Resort) و (Floridays Resort) و الإثنين ممتازين جدا
  • Caribe Royal Resort: المسبح حقه ممتاز - في الدور الثالث غرفة غسيل - السويت عبارة عن غرفة و صالون - السعر مقبول بس فيه أرخص منه لكن انا فرغوووص (شايف نفسي)
  • Floridays Resort: في تريب ادفايزور يعتبر الأول و الأفضل - المسبح لك عليه - الغرف ممتازة و كبيرة - المطبخ ممتاز - غسالة و نشافه في كل غرفة - المواقف متوفرة - الانترنت يقولك ببلاش لكن في نهاية الرحلة يقولك أدفع 13 دولار على كل يوم مقابل مواقف و الإنترنت ... فأحا .. لكن يستاهل و للمعلومية عشان سكنت فيه 17 يوم زبطونا و أعتبروها ببلاش
  • شخصيا.. لو رحت السنه الجاية حابب اجرب فندق أخر مش بسبب معين لكن هناك ما هو أفضل و مليااااااااااااان ..
  • انا حجزت الفنادق عن طريق مكتب طيران أعرفه في مدينة جدة .. أعطاني سعر أقل من الإنترنت (الركائب السريعه) أسألوا عن واحد إسمه كريس (فلبيني بس صايع و فنان)
الطيران
  • بغض النظر عن ما نسمع من مشاكل الخطوط السعودية لكنها الأفضل و الأرخص (تروح يا نيويورك أو واشنطن)
  • مدة الرحلة 12 ساعة
  • وبعدين من أي مدينه منهم .. لأورلاندو .. المدة 3 ساعات تقريبا
  • قبل ما تطلع الطيارة أشتري (شيبس و حلويات و مجلات لزوم الفله داخل الطيارة)
  • شيل معاك شواحن الموبايلات و الأي باد عشان فلة الطيران وتقدر تشحن
  • دواء الكحة أو منوم مهم جدا عشان تنام و ما تحس بالرحلة
  • حاول تتعرف على إللي حولينك في الطيارة يفيدوك أكثر من أنهم يضروك
  • لو جنبك عائلة فيها أطفال رضع .. أعمل حسابك إنك تجيب كرباج عشان تصقع الأب قبل الطفل
ملاحظات هامة:
  • الفلوس بدلها دولارات من السعودية
  • مهم جدا يكون معاك عملات من فئة خمسة دولارات عشان عربية الشنط
  • البطاقات الإئتمانية .. شر لابد منه .. من جد مهمة جدا هناك
  • خليك كوووول ولا تعصب ... ترا الناس تطالع فيكم هناك ... حاول إنك تبتسم دوما
  • لما تسافر .. حاول تلبس قطن .. ولا تعملي فيها حلو .. ترا 12 ساعة ماحد عندك
  • في خط سير ممتاز إللي هو من جدة إلى أي بلد أوروبي ... لندن مثلا و من لندن إلى أورلاندو بعدين 9 ساعات .. أنصح بيه كمان

وبكذا نكون كملنا الجزء الثاني من أورلاندو .. جزئنا الثالث والأخير حيكون عن إيش الواحد يعمل ويروح في أورلاندو و كم يوم تكفي!!
============================
================
=======
===


تعليقاتكم من أجل التطوير تهمنا ... وسامحونا على التقصير
بس وكدة
Subscribe
Aido Advisor
our facbookgroup click below
Please Follow me on Twitter
@aido4ever
:)
=============================================
لمتابعة تقارير مطاعم جدة زورونا على مدونه
لمتابعتنا على تقارير السفر و السياحة الآخرى زورنا على مدونة




الأربعاء، 16 مايو، 2012

أورلاندو الجزء الأول (Orlando part1)

أورلاندو- فلوريدا
Orlando- Florida

"مدينة أورلاندو في ولاية فلوريدا الأمريكية تعد من أهم المدن السياحية في العالم. فهي من المدن اللتي تبعث "الإبتسامة" من أول اليوم حتى آخره وليس فقط للأطفال.. حتى للكبار. أورلاندو في رأي الشخصي نجحت في جلب السعادة لكافة أفراد العائلة من حيث الخدمات و المرافق الترفيهية للعوائل بالإضافة إلى السعر المعقول إذا ما قارناها بأي مدينة آخرى في أوروبا أو آسيا"

=================================
"التقرير سوف يكون عبارة عن أجزاء وفي كل جزء سوف أقوم بالتغطية الكاملة (إن شاء الله) بكل ما يفيدك عزيزي القارئ"


 في تقريري سوف نضيف بعض من الإثارة على ما أظن لم يقوم أحد بالكتابة عنها من قبل وباللغة العربية.. ومصدرنا الرسمي لتلك المعطيات من موقع (Visit Orlando News and Media) .. بالإضافة إلى كثير من الأفكار الشخصية اللتي يريدها السائح السعودي في حالة رغبته للسفر إلى أورلاندو- فلوريدا:
  • قبل السفر إلى أورلاندو
  • أثناء تواجدكم في أورلاندو
  • بعد السفر إلى أورلاندو
طلبي البسيط منك عزيزي/ عزيزتي القارئ .. نشر هذا التقرير للكل بحيث تعم الفائدة قدر المستطاع... أتمنى إن أكون (خفيف ظريف) أثناء قرائتكم لتلك الإرشادات البيسطة.


أورلاندو على السريع

مدينة أورلاندو تقع في جنوب شرق الولايات المتحدة بولاية فلوريدا حيث تعدادها السكاني أكثر من 2 مليون شخص. تشتهر مدينة أورلاندو على المستوى السياحي بأنها المدينة اللتي تجلب الإبتسامة في وجوه زائريها بسبب تعدد الثقافات و وكثرة الأماكن الترفيهيه لكافئة الفئات العمرية من العائلة.

درجات الحرارة لمدينة أورلاندو
كلمتين من الأخر تقدر توصف الجو هناك (حر .. موت)
نستطيع أن نقول أن درجات الحرارة لمدينة أورلاندو تنقسم إلى:
من أكتوبر إلى مايو
النهار (22-27) درجة مئوية
الليل (16-20) درجة مئوية
من يونيوإلى سبتمبر
النهار (27-32) درجة مئوية
اليل (20-25) درجة مئوية

حقائق عن أورلاندو
  • أورلاندو تعتبر عاصمة السفر والسياحة العائلية في الولايات المتحدة
  • كرقم قياسي عدد السياح اللذين زاروا أورلاندو في عام 2010 تخطى 51 مليون زائر
  • أفضل مكان في العالم من حيث توفر المنتزهات والملاهي
  • يتطلب من السائح 67 يوم (كل يوم 8 ساعات) من أجل إتمام كافة الأماكن السياحية الموجوده في المدينة
  • يوجد في المدينة تقريبا 450 فندق!! أي ما يعادل 115000 غرفة تستقبل السياح لأورلاندو
  • يوجد بها 5000 مطعم (تحتاج 5 سنوات لزيارة كافة المطاعم الموجودة)!!
  • مساحة الأسواق الموجوده في أورلاندو تعادل 900 ملعب لكرة القدم الأمريكية!
  • أول منتزة مائي في العالم كان في عام 1977 تحت مسمى (Wet n Wild) في مدينة أورلاندو ولا يزال موجود حتى اللحظة هادي


جديد أورلاندو لعام 2012
  • (SeaWorld) إضافة لعبة (TurtleTrek) ثلاثية الابعاد تعرض مغامرات السلاحف تحت البحر
  • (Discovery Cove) بناء على الأخبار في شهر 6 سوف يتم إفتتاح "واحة المياة العذبة" مفاجأة!! ومافي أخبار زيادة عنها
  • (Universal Orlando) سوف يتم فتح لعبة ثلاثية الابعاد لفيلم الكرتون الجديد (Despicable Me)
  • (Universal Orlando) تجديد لعبة سبايدر مان وإضافة مزيد من التشويق
  • ( Universal's CityWalk) إفتتاح ملعب جولف (تسالي مش محترف)
  • (Walt Disney World) إفتتاح المرحلة الأولى من (فانتازي لاند) المتواجدة في (Magic kingdom) بعد التعديل
  • ( Downtown Disney) إفتتاح (Splitsville) لألعاب البلياردو و البولنج
  • (LEGOLAND) إفتتاح المدينة المائية (أجدد مدينة مائية في أورلاندو)




الجزء الثاني سوف نركز على العائلة السعودية ومتطلباتها قبل السفر وأثناء السفر ... ترقبونا في الأيام القادمة
=======================================
تعليقاتكم من أجل التطوير تهمنا ... وسامحونا على التقصير
بس وكدة
Subscribe
Aido Advisor
our facbookgroup click below
Please Follow me on Twitter
@aido4ever
:)
=============================================
لمتابعة تقارير مطاعم جدة زورونا على مدونه
لمتابعتنا على تقارير السفر و السياحة الآخرى زورنا على مدونة


السبت، 17 ديسمبر، 2011

Aido with Siri (Love Story)

AIDO WITH SIRI

"A Love Story with emmotians"

"قصة حب بدأت من أول يوم سمعت عنها .. هناك أشخاص أو أشياء تحبها حتى من قبل ما تشوفها .. بدأ الحب مع بداية شهر أكتوبر.. كان نفسي اشوفها او حتى أتكلم معاها كلام عادي"
=====================

إيش يعني سيري؟
هادي الله يسلمك برنامج ذكي في أجهزة (ipone4s) الجديدة.. بدون أي كلام زايد أعرفكم بالأخت (SIRI)
 
 يا جمالو يا جمالو
لووول عجبني الموضوع

ما هي مميزات سيري؟
موقع (http://www.iphoneislam.com) (أي فون إسلام) جزاهم الله خير جابو كافة مميزات المحبوبه سيري

كمان شبكة إقلاع سوف (الأخ طارق) جزاه الله خير تحدث على المعشوقه سيري بإستفاضه في جزئيين

طيب حلو .. وليش قررت تشتريه؟
والله يا حبيبي كان عندي أي فون (3GS) وبعته على أساس كان حينزل الأي فون الجديد .. وبالصدفه جات معاها الأخت سيري

طيب حكيني كيف تجربة شرائة؟
بدأ بيع (Iphone4S)في المملكة العربية السعودية  فجر يوم الجمعه الساعة الثانية عشر من تاريخ 16/12/2011. وبحكم إنه عملي ومن ذاك اليوم وأنا بفكر هل سيأتي الوقت إللي أنفرد فيه بمحبوبتي.. في الوقت إللي نزل فيه .... كان مافي فلوس لول .. وما عندي إستعداد أجيب أقل نوع .. وعليه قررت أشتري الجهاز عن طريق الكردت كارد وياللللله إن شالله محد حوش ... كللوا لجل (SIRI) يهون والليل يا غليل (خدمي مو؟)

كثير منكم حيقول:
شغال عندهم وما عليك لا تستنى في الزحمة ولا أبو كلب...
زبطوك الموظفين وأشترولك قبل ما يفتح الباب .. فلكل مشكك في مصداقية عيدو أصريت على نفسي (فكوووووووني عليهم) إنه أصور كل خطوة قدام الناس .. وأتمنى من الكل يحترم الدور و نرتقي بالأدب مو عشان أنا هنا معناتوا طزززززز في الناس إللي جالسه تستنى دور.

طيب ياخويا .. أثبتلي

 البلو كاربيت عشان الشوفه بالكم
 
 مجموعه من الشباب مخصصين عن أي إستفسارات (Iphone4s)
 ماكينة مخصصة نقدم فيها هوت شوكليت - كابيتشينوا - شاهي - نيسكافيهو وأي خدمة
 قبل ما تدخل .. شوف الجهاز واللون المطلوب موجود ولا لأ عن طريق اللوحة هادي
 
جهاز سحب الأرقام
دا كان رقمي
الموظف (حجبنا صورة الموظف لأنه سكسي وممكن يعجبوا فيه ناس وكدة) بس إللي حابب يعرف مين هوا أقولكم عادي لوول
اللحظة إللي الحضارم ما يحبوها وأنسحبت الفلوس حق ال (Iphone4s-64)
وشرف المليح لولولولولولي (قولوا ما شاء الله) ترا العين حق
يا أشود سا سواد الليل يا أسود
وهادي اول مرة أشتغل بالجهاز والحمدلله تمام
 رحنا عند الجيران نجيب عازل الشاشة
 وهادي أول صورة من أي فوني الجديد (يا ناسو)
الإنشتا جرام حيكون له فعال ونعود له من جديد

الهدف من التقرير؟؟
أول حاجة ترا حالنا من حالكم وحابب أقول للناس ترا أنا أنتظر بالدور وأقرف وكدة .. مو كل حاجة بهلله
ثاني حاجة .. باركوووووووووولي أشتريت أي فون الجديد :) وكان نفسي أشتريه من أول يوم بس المكان كان زحمة ولما لقيت المكان فاضي ومناسب أشتريته..
والهدف السري ... الليله سهرتي مع (SIRI) ... لحد يكلمني اليوم ...

وإليكم بعد المقاطع إللي تضحك مع ال(MOZZA) سيري

بس وكدة
==============================================

تعليقاتكم من أجل التطوير تهمنا ... وسامحونا على التقصير
بس وكدة
Subscribe
Aido Advisor
our facbookgroup click below
Please Follow me on Twitter
@aido4ever
:) 
=============================================
لمتابعة تقارير مطاعم جدة زورونا على مدونه
لمتابعتنا على تقارير السفر و السياحة الآخرى زورنا على مدونة

الخميس، 24 نوفمبر، 2011

O2 ARENA - LONDON "من أروع أماكن لندن"

O2 ARENA
قبًة لندن (O2)
"من أروع أماكن لندن"
مكانها
==============================
"قبة لندن من الأماكن إللي كان إفتتاحها مع الألفية الجديدة وكانت الحكومة البريطانية معشًمه إننوا المكان دا حيكون له دور أساسي في السياحة تحت مسمى لندن دوم "london dome"
اللزيز في الموقف .. إنها قفلت بعد سنة من إفتتاحها! وبعد صد و رد تم إفتتحها رسميا في عام 2007 مرة تانية بشراكة من
O2 mobile company
BMW cars
AEG event
وخلوا إسمها
O2 ARENA
هادي العالم ما تلعب وخلت المكان يستحق الزيارة وممكن أكثر من مرة وحدة كمان.. نخش في الموضوع"
============================================================
زاوية الشكر
ولله الحمد تخطينا حاجز 25000 زائر للمدونه
من جد ألف مليون شكر لكل من دعمني بكلمة شكر أو نقد بناء وكدة
=============================================================
بداية
(كيف بس) :p
بس يا حمزة!! على بالك مقدم برامج .. المهم إيش حكاية المكان؟
(O2 ARENA) تقدر تقول حاجة زي مركز الحارثي للمعارض عندنا هههه مع إحترامي لفارق التشبيه. يقع في شرق لندن ومشوار عشان الواحد يوصل له لكن أول ما توصل تقول يستاهل المكان الزيارة و المشوار الطيب.
هوا بكل بساطة .. مكان لعقد المناسبات في لندن من حفلات و مباريات أو مهرجانات.. وللمعلومية (O2 ARENA) حيلعب دور جداً مهم في الاوليمبيات القادمة في عام 2012. ومن مزايا المحل إنه يمتلك ساحة مغلقة كبيرة جدا تتسع لما يقارب 20000 شخص أو أكثر على حسب توزيع و نوع المناسبة.
مقطع من تصويري:) (مريم فارس كانت جبنا لول)
المنظر من تصويري هههه

عجيب.. طيب إيش الحلو في المكان؟
طيب انا أقولك إيش الكوول وإللي منه تكتشف قد إيش المكان دا حلو:
  • ثاني أكبر صالة مغلقة في بريطانيا بعد الصالة المغلقة بمانشستر.
  • أكثر مكان في أوروبا إزدحاماً وعليه فعاليات على مدار السنة..
  • قبل ما يموت مايكل جاكسون .. كان حيسوي حفلاتو فيها؟
  • مهرجانات الديزني (على الثلج) و سندريلا
  • أغلب مهرجنات السيرك العالمي
  • الستاند أب كوميدي
  • المصارعة الحرة
  • حفلات المغنيين المشهورين (الموزز)
  • سينما
  • مطاعم
  • صالة تزلج
  • نايت كلبزز (كدة أحلى)
  • لاونج
  • أيييي خدمة
من الأخر المحل مررررة فله... الحلو في الموضوع إنه في الفترة الصباحية يكون جدا عائلي ولمن يجي الليل ... يقلب مكان سهر و فله..

طيب حلو.. كيف الواحد يوصل له؟
أضغط على هنا وحتلاقي الطرق المتعدده للوصول للمكان.. من تجربة شخصية ... طلعت للباص النهري السريع إللي يطلع من (london eye) وينزلك على باب المدخل ...طيب ليش أخترت الباص النهري؟ انا أقولكم ليش:
  • هبقه :)
  • أسرع
  • لو أخدت الباص في 200 متر أمشيها
  • لو أخدت تاكسي معناتوا حأدفع مرررة كثر
  • لو أخدت المترو .. كمان في مشوار مشي وانا الطاقة عندي مهمة وما فيا أمشي (سعودي غير رياضي) نعم هذا انا :)
يوه طيب أعطيني حكاية الباص النهري طالما زي كدة ؟
شوف يا سيدي, إسم شركة الباص النهري (Thames Clippers) حلو؟ ... الروحه تاخد تقريبا نص ساعة .. و الرجعه 15-20 دقيقة ليش؟ عشان في محطات ما يوقف فيها في الرجعه. تكلفة الشخص روحة ورجعه تقريا 12 باوند.
في ميزة غير السرعة ومهمة.. متعة الطريق .. يعني نهر التايمز من أجمل الأماكن  إللي الواحد يتمشى فيها .. ومنها تشوف المنطقة التجارية حقت لندن إللي فيها الأبراج (حاجة زي ناطحات السحاب). لمزيد من المعلومات عن الباص النهري يمكنكم زيارة موقعهم  (Thames Clippers)
مقطع فيديو جيد يوضح الفيلم الهندي


طيب حكيني يا سيدي عن تجربتك في المكان...
والله انا رحته مرتين في حياتي .. الأولى وكانت لدعوة السهر (وكانت طيبه) هاذي للدشير و الثانية لحضور حفلة بيونسي (برضو للدشير بس جدا محترمة. ومخطط إني أروح له في مناسبة للديزني مع إبني لأنه يقولوا حاجة جدا رائعة. حابب أبشر الناس الأكيله إنه هناك مجموعة من المطاعم الممتازة إللي تقدر تاكل فيها .. أضيف إنه هناك في سينما مرة كبيرة .. يعني ممكن تقدر تحضر فيلم جديد وبعدها تروح تاكل في أحد المطاعم الطيبة زي ناندوز أو بيتزا إكسبريس. لمزيد عن المطاعم الموجودة أضغط على هنا
 نقطة جدا جدا مهمة ... البطاطس !! نعم هناك في محل في داخل الأرينا يبيع بطاطس خيييييياليه إسمه (Salt + Vinegar Fish and Chips) .. أح على كدة بطاطس لن أنساها في حياتي
 مقاطع فيديو توضح المناطق العامة في (O2)

طيب كيف الواحد يختار مكان كويس وآمن . بالك سعوديين ومعانا عوايل طال عمرك وكدا؟
سؤالك مرة فنان.. على حسب يا سيدي المناسبة .. يعني لو مصارعة حرة حتلاقي أفضل مكان المنطقة إللي تحت .. انا أنصح دايما في حاجة إسمها (Level 1) ليش؟؟ .. بعيدة عن الخنبقة و أمان للأهل و تقدر تشوف كل حاجة تمام. بعد كدة أنصح بمنطقة ثانيه إسمها (Level 2) .. وكل ما تقرب من الحدث كل ما يزيد السعر.. الرجاء ملاحظة إنه لو كانت المناسبة صارخة زي مثلا حفلة بيونسي التذكرة الرسمية سعرها 62 باوند .. وهذا الشي انساه لأنه في يوم واحد التذاكر تروح ووعليها لازم تضطرتشتري من السوق السوداء (أسأل الفندق حقك حيقدر يزبطك) يعني مثلا انا كنت في (Level1-Bluk111) طلعتلي التذكرة 120 باوند شوفوا المنظر...
ركز في الموقع مو شي ثاني يالوسخ لووول

طيب طيب .. إيش عندك تاني حابب تقوله؟
والله (O2 ARENA) من الأماكن إللي واحد لازم يروحها .. حابب أضيف نقطة مهمة جدا .. المكان يعتبر معلم جميل من معالم لندن .. وجدأ أستغرب إنه هناك ناس يروحوا لندن بصفة سنوية و عمرهم ما عتتبوا أكثر من منطقة هارودز. أتمنى من الأخوان إللي مسافرين لمدينة لندن يخططوا في أحد أيامهم إنهم يزوروا المكان دا.. العائلة حتنبسط و إللي ناوي يفلها كمان ينبسط و تجربة جديدة لازم الواحد يعملها .. ومرفق إليكم كل المناسبات والحفلات القادمة هناك عشان تتأكد إنه في حاجة تعملها وقت ما إنت هناك .. أضغط هنا
==============================================

تعليقاتكم من أجل التطوير تهمنا ... وسامحونا على التقصير
بس وكدة
Subscribe
Aido Advisor
our facbookgroup click below
Please Follow me on Twitter
@aido4ever
:) 
=============================================
لمتابعة تقارير مطاعم جدة زورونا على مدونه
لمتابعتنا على تقارير السفر و السياحة الآخرى زورنا على مدونة









الخميس، 3 نوفمبر، 2011

Montmartre Paris - مونت مارت (باريس)

Montmartre - Paris
مونت مارت - باريس



"من المناطق إللي لازم الواحد يزورها في مدينة السحر والجمال باريس.. هي عبارة عن قرية صوغنطته جدا لكن مع التوسع العمراني, صارت جزء من باريس. فيها طابع من الطراز القديم لفرنسا وبمجرد دخولك لها حتشعر بالإيجابية و روعتها كمنطقة .. المهم ندخل في الموضوع بدال اللوك لوك الكتير"
=========
=====
==



ها .. إيش حكاية المنظقة هادي؟
مونت مارت (لازم تنطقها زي الفرنسيين عشان لا تتفشل مع أهل المنطقة) يا سيدي عبارة عن منطقة قديمة زي القرية كان يسكنوا فيها الناس إللي معروفين بي (البوهيبيين) يعني ناس إيمانهم كللوا عبارة عن فن سواء (رسم أو شعر أو كتابة مقال أو غناء أو رقص)! والدليل على كدة  .. فان جوخ و بيكاسو و غيرهم من الفننانين كانوا بيشتغلوا و عايشيين هناك (لما تروح هناك ممكن يوروك بيوتهم أو الإستوديوا إللي كانوا بيشتغلوا فيه) .. و في نهاية المنطقة موجود كابريه مولان روج (molan rouge) إللي الفيلم مقتبس مننوا ...
ALL YOU NEEEED IS LOVE.... LOVE IS JUST A GAME
(يعني أديها سهرة أخر الليل يا معلم كمان)

هادي الضاحية تعتبر أعلى منطقة في مدينة باريس بحيث منها تقدر تشوف مدينة باريس بمنظر جدا جدا خلاب ... إليكم بعض الصور إللي ممكن تقدر تاخدها من فوق .. الرجاء ملاحظة محترفي التصوير ... هناك حتبدع بالصور
طبيعي أنا ماني وجه الصور إللي فوق بس هادي جبتها من مواقع الإنترنت ... لكن شفت المناظر هادي وأنا هناك.  كمان هادي المنطقة مشهورة في وقتنا الحالي بالرسامين .. ما تحتاج وتتعب و تدور عليهم ... منتورين هناك زي الرز و مررة كتير وإليك صورة لهم و لفنهم الجميل
وكالعادة زيها زي أي منطقة أو حارة في باريس .. الأكل والفنادق موجودة كمان. أذكر إنه هناك في فندق إسمه La Villa Royale  كل غرفة فيه لها إسم فنانه معينه زي مادونا و شير و زي كدة (الغرف جدا جدا جدا مثيرة بكل ما تعنية الكلمة) شوف المقطع وإنت أحكم ... إنت و ضميرك  

طيب حلو الكلام ... كيف الواحد يوصل لهادي المنطقة وأنا ساكن في الشانز مسلاً؟؟
حلووو جيتني في الهرجة .. تعتبر منطقة مونت مارت بعيدة عن المناطق السياحية إللي في باريس من متاحف و إلخ إلخ .. عندك عدة طرق .. انا بحكم كنت أبله وماني داري أول مرة رحت يا معلم مع تاكسي و رزعني بتكلفة 25 يورو. لكن بعد الحنبشة و التدوير أكتشفت إنه الأندرقراوند يوصل .. إليك الإرشادات لو كنت ساكن في منطقة الشانز إليزيه:

  •  تدخل كونكورد إستيشن
  • تدور على لاين رقم 12 الأخضر
  • حتلاقي خريطة تقولك إننوا المحطة إللي بعدها هيا مادليني (هذا هو القطار) ركككز معايا
  • تقريبا حتعدي ستة أو سبعة محطار لما تسمع أو تشوف محطة إسمها إبسيس .. أخرج لأنه هادي هيا المحطة المطلوبه
وأخيرا وصلنا للمنطقة .. هناك إختيارين للوصول للأعلى:
  • الدرج: وبحكم في المرتين إللي رحتها ما شفت ولا خليجي طالع فيها فإليكم الحل الثاني
  • أصنصير خاص: أطلع منه وريح دماغك بدال التعب .. ترا وراك مشي مو طبيعي لسه في المنطقة
طيب طيب ماشي... خلاص وصلنا و مع المقدمة إللي قلتها ... إيش وظيفتي غير إني أصور المنطقة و أخلي أحد يرسمني؟
مممم جيد السؤال .. شوف أولن هناك في زي القاطرة تمشيك حولين منت مارت شوف الصورة
أنصحك أول حاجه تاخدها عشان يعطيك فرررة عن المكان تشوفه على السريع ومنها تشوف الكنيسة إسمها سانت بيري إللي ماني فاهم بوهيبيين و حقون طنقره وعندهم هادي الكنيسة ..
بعد ما تتمشى يا حلو بالقاطرة شوية تسخين للرجول و حركات رياضية أزقح مع العالم إللي بتمشي ..
 هنا تقريبا حتقضي ساعتين إلى ثلاثة ساعات ما بين مشي و تسوق أو تقدر تقول تبضع ومنها ترسم نفسك و تجلس تكاسر مع الرسام إلين ما تجيب سعرالصورة الأرض يعني تقريبا لو فنان في المكاسرة ممكن توصل معاهم 20 - 40 يوروا مع العلم إنه حيبدأ معاك ممكن من 200 يوروا بحكم حضرتك الأستاز "عربي" و سعودي كمان هلا هلا هلا حيقولك .. فإنت أجلطوا و وريه إننا ناس بخلاء جدا.. وطبعا يتخلل المشي شوية تحابيش خفافي من وجبة كريب بنوتيلا (الله عليها أليمه)

أتفرج على الألم وبرميل النتويلا دا إللي أفتكر كان نفسي أسبح فيه ههههههههه من جد حاجة خرافية

 ولا يا سيدي على الكريب بالجبنه حقتهم دي إللي تقلب جبنه كاسات بس بيضاء وفيها شوية حماض من النوع إللي نفسك تشرب معاها شاهي حبك و زيتون هههه من جد مرة طعمه ....انا أقترح كل عشرة دقايق تسحبلك وحدة كريب و تجربها كلها ههههههههههههههههههههه انا ما عملتها على فكرة ....طبعاً السيدات تمشيتهم غير حقتنا هادي .. مونت مارت يتميز بمحلات الملابس اللوكل و السكارفات و اللأنتيكات و التحف إللي أسعارها ممكن أقل من باريس نفسها بكثير وطالما في مكاسرة في الموضوع يعني إنت وشطارتك ... عموما المحلات مليانه هناك للتسوق وحاجة ماهي بطالة .... حلوة يعني

حلو ... طيب لو الواحد تعب و يبغى يجلس يرتاح شوية أو يشرب حاجة؟؟؟ كل الحل؟
مو قلنا!!! يوه الكريب ما كفاك؟ خخخخخ أكيد مونت مارت تتميز بالكافيهات و المطاعم القديمة  واللي لها طراز جميل وكل محل يعمل حاجة يتميز فيها عن المحل الثاني ... إليك بعض الحاجات إللي ممكن تشوفها في مطاعم و كافيهات مونت مارت صح نسيت والباستريز حقتهم
وبعد الأكل والتسوق و التمشية الجميلة إللي ممكن تاخذ يومك كللوا هناك ... جا وقت الصلقحة والتأمل و الإستكنان في أحلى جلسة مصارحة مع نفسك .... هنا

مااااااااااااااشي ... في شي تبغى تضيفة؟
والله انا حبيت المكان من الروح الخفيفة إللي فيه وكمان خرجت من نطاق المدينة إلى حاجة صغيرة و فيها أشياء كثر ... مونت مارت من الأماكن إللي ممكن لو حبيتها حتكرر زيارتك لها و من جد ممكن تجلس يوم أو يومين في أحد فنادقها .. في الأخير منطقة تستاهل كل يوروا يندفع فيها.  قمة المتعة و الغروب وإنت جالس مروق أعصابك فوق ... من جد شي روعة.
يقولوا فيها تصير سرقات و ما أدري إيش ... انا ما شفت حاجة مثل هيك أبدا و طالما إنك ماشي مع الزحمة ومافي حاجة تخاف منها فما عليك و ربنا معاك ......

 أخر الليل مولان روج ها :p هههههه

وهادي بعض مقاطع اليو تيوب المساعدة للشرح


بس و كدة
ميرسي

AidoAdvisor